NUENTAR AD LA BASA A SEM TUTT AD NA RASA

A sem tutt ranar par i mudnes che quend i dascor con nuentar is disan: “ mo sa vliv uetar ad la baasa, mo sa vliv uetar ranèr”

A vivem in d’iavai basi in mes a tri fium, al Panara, al Secia e al Po, mei che la Mesopotamia che l’ag n’iva sol du, Tigri e Eufrate; i nostar antenaa i s’è sempar iutaa un con clatar par sugar al teri che ogni tent i gniva invasi da l’acqua d’un qualc fium ca rumpiva i’arszan e fin dadlè è partii al spirit c’à fat nasar al cooperativi tipichi dal nostri teri.

A dascurem tutt circa al stess dialett, a magnem tutt i gnocc fritt col salàm e i macaron al petan col ragù, a magnem pir langorii e mlon, ma ognun a la so stagion,  abvem tutt al lambrusc, d’inveran a taiem tutt la fumena col curtell e un qualchidun ag pogia infèn la bicicleta par via cl’an casca….

A psem andar in qualsiasi famiia da Final a Cuncordia e da San Prospar a San Martèn da bass, dascurand in dialett che  tutt is capisan (basta cl’an sia extracomunitaria).

D’instaa a patem un cald da porc e al sinsali l’is ciucia infèn al sanguv.

A savem cus a vol dir metar al porc a l’ora e star da la banda dal furminton, parchè i nostar vecc i masavan al porc e i magnavan la pulenta.

Infèn al teremot col so cratere sota a la Basa al s’à mis para tutt, con la prima paca a Final al vint ad magg domiladodas e la seconda a la Mirandla al vintnov dal stess mès.

Nuentar ad la Basa em fat i sacrifisi rinunciand a tri usdai su quatar e a Sasol e Carp i sfruta i nostar sacrifisi.

I s’à sempar ditt che tuti al stradi li portan a Roma…. mo inveci a Modna em vist che li portan tuti a Sasol.

Dop tutt quest an sem minga bon ad decidras a far un mucc sol, quei ad la Basa o Area Nord, sa continuem  acsè i mudnes i carpsen e i sasules i s’al metan là andu as nasa i mlon, par tutt i vers, cumpres sanità e viabilità.

Se i cumun c’an n’à ancora completaa al conferiment di servisi i s’impgnasan a far un pas aventi, se a cal punt chè l’aministrasion mirandulesa, la capis ad faran un indree, a la fèn as prev ancora salvar baraca e buratèn……!

Mitemas na feta ad caion in bisaca e pruvem a pinsar insem e dir NUENTAR AD LA BASA A SEM AD LA STESA RASA; se ag la cavem a dir questo,  dopa l’è un atim a capir che a psem far UN CUMUN SOL, quel ad la BASA….!

Mirandola 25/06/20

Ubaldo Chiarotti