Quatar gioràn fa a ricèv na telefonada da n’amigh, ” venat con to muièr a magnar do cicciuli a cà mia dmenga a mezzodì ?”Capìrà l’è cmè invidàr n’oc a bèvar…..certo!!!!!

Alle 7,30 dla dmenga da matinna l’um ciama tutt disprà “gh’hat na piastra in ghisa da mettar su un furnel a gas ? Certamente! A tla slong subit ! A riv a cà sua a ott ori e at catt in giarden  zinch umastrass in tenuta da maslàr con na parciadura ad pgnatton e na muntagna ad carna! Alla faccia dal do cicciuli! Appena i’m vedan l’è tutta na festa, as presentem e a sem subitt parent. Su una tavla un tulèr   con inzimma na coppa, du salam “uno stagionato due anni e uno fresco”na panzètta, quàttar butigli ad prosecco di cui tri già vodi e un gnocch col cicciuli. I t’invidan subit a magnàr, “tasta ch’al salam chè e pò t’am dirà! E ch’la panzetta chè, tasta tasta! Las dasfà in bòcca sent che profum!”. Pran far minga bruta figura a tac a magnàr anch sl’è sol ott’ori e dop un poch agh ciap gust. Ch’al gnuchen con la panzetta l’è propria squisiì ed il prosecco l’è propria la so mort! Al me amigh l’è già in cla fase ” s’at vol a t’imprest anch me muier!”

Par furtuna che la me sposa la m’iva lett i patt! Essere a casa subito! Perciò a las la cumpagnia e as dem appuntament a mezzgioran pinsand ad vedri tutt sott a la tavla con quel chi eran dre magnar e bevar!

A ripett… “alla faccia dal do cicciuli” ! A rivem a mezzgioran e un quart e a sembra un matrimoni! Agh sarà zinquanta parsoni chi dascoran in tant ruglett e i me amigh ciciular con estrema profesionalità chi cosan i so quei. Chi al mesda al ciciuli in un gran paròl, chi con al capel da cogh al prepara la pulenta e chi al cuntinua a bevar ormai imbariagh.

Al grido “tutti a tavola!” l’è na gran festa. I tacan prima con gnocch, pulenta e panzetta, cicciuli salam e coppa… dop (par verar al stomagh) un bruden ad capòn con dentar soquant caplett. Al temp giust par punsar al stomagh e pò sotta con un risotto con salsiccia alla mantovana ch’at gniva i lagarmon a i occh tant l’era bòn.A ch’al punt chè un al tacca a pinsàr un pò preoccupà “cusa sen invintà adess?” Presto detto…. un fegato di maiale alla veneziana che gnach a Venezia i al fan acsè bòn e una muntagna ad spiedini di carne di maiale la cui ricetta è segretissima! Chiaramente al padron e la padrona ad cà dòpa i g’ha zuntà frutta dolci caffè e liquorino a volontà e solo allora i nostar amigh cogh i sè finalment rilassa e i en gnu in cumpagnia e… che cumpagnia! Ridudi a volontà !

E’m fatt zinc’ori dal dop pranz ch’as snin sem gnanch acort…….. a parte un gran mal di testa ch’al na me ancòra pasà.

Grazie! Grazie al me amigh e a la so sposa e grazie al “Gruppo cicciolari di Quistello” bravi !