Et capì, Iusfón ?

Al Prét al predicava da l’altar

sul mistero dla Santa Trinità:

L’è ‘na roba impussibil da spiegar

gnanc se a discuréssan par n’enternità!

S.Agostino l’era pur intelligent

mo gnanca Lu’ al na’ccapiva gnént!

An gh’è aritmetica, nè geometria

cla possa un po’ spiegar cumèla ‘ssia!

lnutil quindi ogni spiegazion:

«l’è un «Gran Mistero»! Et capì, Iusfón?

E Iusfón al rispondi «A son cuntent

parchè ag n’è tanti, cumè mi, c’an capiss gnent!

Però sovra ogni scienza e professor

mi ac cred, parchè a l’à ditt al Sgnór!

Gnent as capiss e as véd,

mo al Sgnor, a torn a dir, ac cred!

A son puvrett, rustic, ignorant

mò a cred «In Nom dal Padar, dal Fiól, dal Spiritu Sant «Amen!

Don Gavioli

Tratto da: Questa an l’ho mai sintida – Poesie nel dialetto di Concordia

Anno 1991