I regài ad Nadàl

Anca st’an al Nadal l’è già surtii,

e la spesa più grosa a l’em pasada:

al smanés di regai al’em suplii,

e as fa al bilánc par vedar cum l’è andada.

Ma quanta corsa, quant’ipocrisia par far vedar a tutt anch quel ch ‘an n ‘è: la gent la par, insém, partir al via già da Novembar, vrend i sò carnè.

In dal casett, l’elenc l’è preparaa e al market già as partiss con i carei: a gh ‘è vansaa di quéi da l’an pasaa: già proont da riciclar, sia brut che bei.

As taca a verar scatuli in cantina, e a salta fora un quél già etichetaa: stav atènti, ch’al vén da me’ cusìna, ch’as ricurdéma quand l’è già incartaa!

Candelier, centrotavola e angiuleen là da Nadal is rivan da ogni banda; gira e volta, ogni inìsi al gh ‘ha una feen e la fa schiva chista sarabanda.

A pool sucedar dòp un qualch Nadal che, girand e girand, al vaas cinees, cambiand bigliett (e atenti da n ‘sbagliaar) al torna indree a quél che agl’iva spees!!!

Mercatoon, negusiett e bancarèli, ma al trionf l’è di centar comerciai, in du ‘as càta butigli fati a umbreli, composisión ad fioor, bestii ed uciai.

E la tragedia l’è se a riva a cà

un portacenere a forma ad bucaleen:

in dul mitemia? Adèsa pògial là

con cla lumera a forma d’un niñeen!

Al cariuleen col ròdi e col carion e l’angiuloon ad plastica: un bisciù! … e un priduss che a seconda dil stagion als culora, pasand dal rosa al blu.

Ma i quei più bèi ien propria di parent ch’ ‘is dà dla ghéga e ièn piin ad milioon; it fa regai ch’i fan spadiir i dent, ma loor i sembran furub, te caioon!!!

It presentan, con gran chirinchinchèen, na mardulìna sèca, ma incartada, e it faan quasi pasaar par un creteen se it la còntan con anch la senegiàda:

a riva un butigliott o un ciunduleen cl’è ligaa col fil d’fer cal sembra oor; as capiss been cl’è un quel da marucheen, ma it fan imbarbaiaar con al lusoor!!!

Ma la richésa l’è dentr’in dal coor e tanta gent l’han n’ha mai capii che i più puvrett ien propria quéi più sgnoor, e chi a gh ‘ha i sold l’è spess al più lintii.

Me a digh che a sarev ora ad dargh ‘un tài e as farevv più cuntent anch Nostar Sgnoor: piantémla da scambiàras di bagài e fémas sol gli augùri, ma col coor.

E se as fésan daboon gli auguri a voos e a sa psiss diir sool quéi sinceer dal tutt, quant magoon ch’a s’andrevv dentr’in dal goos, e a vadrisan in gir sool di gran mutt!!!

Brunetta Panzani