Siccità!!! Un bell sapell!!!

Ogni gioran ca passa as guarda in sù:

da més in Italia e in dal mond an piov più!

E se a cuntinua ‘sta bèla situazion,

a ghè propria d’aver paura da bón!

A Cuncordia a gh’era tanti mulin

chi masnava al furment di cuntadin:

se i g’fuss incora con questa siccità

oltre l’acqua al furment ag mancarà!

Intant in attesa che al ciel as cummóva

i Nostar Rasdor is metta a la prova:

«Non consumate nè acqua nè vino:

per necessità usatene pochino!

In tale situazion, piuttosto brutta

inveci che in brod, magnè dla pasta asciutta!

Usate poco i water, andè in campagna

cumè ‘na volta, chè nessun si lagna!

Poc acqua par lavaras e far bucato:

una volta a la stmana: tutto è risparmiato!»

Con tutta la scienza e i scienzà

se a manca l’acqua, a sém ruvinà!

Gnanc Gorbaciov e gnanc al sior Bhus

i sarà bon ad cavarag un ragn dal bus!

E utar bavdor pinseg un puchin:

sensa l’acqua an sfa gnanc al vin!

A son sicur che se a prega i bavdor

i sarà bon ad cumovar nostar Sgnor!

Se lor i dventa cumè «Il Santo Bevitore»

il Cielo si aprirà in loro onore!

Con un mond ascì brutt e disgrazià

Al Sgnor al vol purgar i nostar pcà!

A sem in Quaresma: bisogna pregar;

e Lu l’è ben dispost a pardunar!

Se a fem pregar anc i nostar putin

Lu l’è bon ad mandaras acqua e vin!

Concordia 13, 2, 1989.

Tratto da: Questa an l’ho mai sintida – Poesie del dialetto di Concordia

Autore: Don Giuseppe Mazzola

Stampati Mucchi – Modena

Anno 1991