Prova a rivar a Mirandla e dmandar… “scusi il signor Mantovani, am sal dir indul stà?”

I taca a dmandarat: “al dutor? quel dal bèni?” Insoma, t’ann riva ad cò a gnint.

Se invece t’admand Mantovini tutt it’rispondan, omm, doni e ragass.

Sarà parchè al vindiva liquor e ven speciai, sarà parchè….?

Al vindiva, parchè adess, da anni, la lasà l’atività ai suo, e al s’è dedicà a l’arte, a la storia, al robi antighi.

Te ad verr un qualunque catalogh da stampi, italian o estar, e al primi sent pagini i’iè dedicadi al stampi ad Giorgio, e po’ in fond, in do o tre pagini, i sistema Alinari, Bazzani, Alberti e tutt ch’iatar…

Oh, i diz chi ven zò fin da Santa Giustina par sarcar quel d’bon su Mirandla!… lagent la savrà al parchè, o no!?

Ma at sa la gent i’indiz tanti…

Giorgio l’ha sempar cuntà cl’è stà in Russia in treno e gnù a cà a pé, mo ic’cardiva in poch..e alora Artebano e Alberto, so fradèl ad Giorgio, i’ià decis ad metral a la prova; i l’ha purtà in Russia in du lù al dgiva da tgnosar Crist e tutt.

Beh, cac’ardighi o no, davanti a’ iiocc spalancà di so cumpagn ad viaz, in dla piasa rosa a gh’era la banda cl’al’spetava, a San Pietroburgo i’ia organisà na festa con cavial e shampagn (ad pomm) e via e via..

E n’omm a csè…, fiol ad Cornelio imperatore, con un fradèl, Alberto, prima tromba al Medison Squear Garden ad Niu Iork, l’è armaz un di nostar, semplicc, cal s’ferma con tutt davanti ai cafè a far do ciacri, …al massim t’al ved a magnar un pcòn ad pisa da Arnold dop mezanot.

Tratto da “Mirandolesi razza ariana” di Gianni Bellini – anno 2006