I amigh dal « RESDÓR » i vol la storia dal Final tuta in ’na pagina. A sarèv cme métar al mar in un bicèr, sl’è na storia vecia quasi cme al mond.

Da du èni gnu i prim òm? Dal fred, a dirèv, cme i nadar salvadghi sui zògh dla val, alora sol dl’acua, e su cl’acua dil barach. Dop na pina atach a d’altra, in du agh’era l’acua dla tèra, di àlbar e il primi ca. E un gioran, tant secul dop, su cla tèra è passa’ i suldà ad Roma, e con lor un cmandant, Zanon, cal parlò ad Gesù Crist, e quatarzent an dop al salvò con la fumana al Final da Attila cl’è dvinta al nostar protetor. E dop d’alora tuta na storia un poc bianca e dimondi negra, na storia cumplicada e in bal Modna, Nunantla,Bulogna e Frara.

La storia d’un canal con na Roca e na Tor, na storia ad cristian, d’abrei e anch ad protestant con Renata di Francia amiga ad Calvino; na storia ad padron, ad sarvitor e ad pret se in dal siezent sett gli era il cès e zinch i cunvent.

Na storia ad suldà frances, tudesch, spagnoi fra la Roca, al Municipi e al Dóm.

Dal temp dil barach su l’acua al patinodromo e a Finalestate quant acua è pasà sot i pont ad Panara?

Na zità negra dvintada rossa ma Dio agh tiena sovra la so man e al la bandisa parchè l’è la più bela zità dal mond.

Gnila a vedar.

Piero Gigli

Tratto da “Al Rezdòr” 1981