L’origin

L’origin dal mè paés, l’é quèsi cumpagna ed l’origin d’ogni paés.

« Fat in là ch’a vègn mè » l’é la frès druvèda da i più fort, da per tutt, in tutti el lingui e in tutt i secol. Però l’é sèimper stèda druveda dóp che, dal gninta e per bisógn, la povra gint la s’era danèda per scarpir, magari cun i deint, al rais ed la gramégna per fer crèser di alimèint indispensabil a la vitta.

E chi érni qui ch’a giva « fat in là ch’a vègn mè »? A l’ò già ditt: i più robùst e qui ch’a gh’iva el màn più lunghi… e dóp, via, via, i fio, i fioi di fio > e acsè fin ai nòster dè.

Al mè paés l’é nè in mes al pantàn e a la sterpaia, in ’na Valèda ciamèda He merósa; al nómm « Carpi » a gh’è chi dis ch’ai deriva dal nómm d’un élber: « Car­pine », e chi da: « Carpazi », chi mòunt ch’a cgnusì tótt, perchè soquant agint ed chi post là, chi eren in misèria, i sareven gnu chè a serchèr la cucagna: puvrèin! Bèin, mè a dàgh poch pés al ciacri, quéll ch’importa l’è ch’ai gh’è, ch’l’é un paés ed lavuradór e « fat in là ch’a vègn mè » l’à servi a fèrsel più bèl e più grand.

Al dialètt

Al dialètt l’à subi, cume tutt i dialètt, l’influèinsa di esercit straniér ch’ in pasè da Chèrp, però, la frès « at vói bèin » l’à resisti in dal tèimp, e a m’àugur ch’la vègna druvèda ancàra méi da qui ch’gnarà, perchè sol acsè as pol truvèr la Pès cun la « P » maiuscola!

El fèsti

Al Patrono, anzi i Patroni: San Bernardèin da Siena, San Bernardèin Realèin, San Valerian per Chèrp, e San Gennaro, San Nicola e tant èter per qui che « sono de Garpi ». El sègri e el féri i stan per sparir da per tutt per laser al post a: La Festa ed l’Unitè, La Festa ed l’Avanti e la Festa ed l’Amicizia; scopo principèl: magnèr!

Perciò, prima: « fat in là ch’a vègn mè »! Adèsa: « Magna te ch’a magn anca me »! E te s’ciavo!!!

Francesco Luppi

Tratto da “Al Rezdor” 1981