AL GAMBI AD CAL DONNI

Al gambi ad cal donni i dan a la testa

e ai zovan e ai vecc ig drisan la cresta,

i zovan i dventan ad tutt i culor

e i vecc tarulii is bagnan ’d sudor.

A vedar cal cossi pulposi darent,

cal belli staneli chi volan col vent

i priat is fan al segn ad la cros

e al vcini invidiosi ag vian al narvos.

Si psisan, i mort i gnarevan fora

e a curarg adria ag piasrev tent incora;

i sent ag piasrev infin dasmingar

che al gambi ad cal donni it portan a pcar.

Nuentar, c’an ghem minga tutt’sti lunari

a vedri acsè ates, as vian voia ad tucari.

Mauro Tinti (Imer)

Tratto da: Turnand a San Szvan

Di: Mauro Tinti

Anno: 1986