La va mal e po’ la cress….!!!

In dal temp dal «Ventennio» un ciarlatan,

che al frequentava un po’ tutti i marcà

e al ‘na vléva mai star col man in man,

perchè al pan al sal vléva guadagnar;

al smitéva in dal sòlit cantunsin

par vendar la sò merce: di ciapin,

di spastin, di curdon, di stecadent,

dil lameti, tutt a un pressi cunvenient!

E ogni tant ‘na barzéléta, ‘na cantada,

ad queli che in cal temp a costumava!

E in dl’intermezz al ripeteva spess:

“Amici, la va mal e po’ la créss!”

Ma un Vigil d’uccasion al s’è fermà

e con ‘n vós un po’ sécca al gà dmandà:

«Amico, che vuol dire questa espressione?

Son parole da multa o da prigione:

Voi offendete il Duce e la Nazione!»

Ma quel Tizio, al rispond senza paura:

«Quel cà dig l’è, purtropp, verità pura:

al guarda mè muier, clè quéla là:

«La va mal, parchè l’è sòpa,

la cress, parchè l’è incinta……………

a dig da bon, an fag minga finta»!

E cal ciarlatan la avu causa vinta!!!!

Don Giuseppe Mazzola – Concordia 18-11-1985

Tratto da: Questa an l’ho mai sintida – Poesie nel dialetto di Concordia

Autore : Don Giuseppe Mazzola

La cartolina è del collezionista Roberto Neri