Al ferii da na volta

Par più d’un mes tutt i so cuntaden

i sa scanavan in dal pulir ben

l’ara salgada, al vidi, al pass, al fnil

aventi e indria sempr in dal curtil

coi cariulen pin ’d giera, iran tutt matt

a pinsar c’à rivava l’avocatt,

al gren padron c’al gniva a godr al ferii

tra chi povr om dasprà dal gren miserii

e quend pò finalment tutt l’ira apost

ecco rivar da Modna al prim d’agost

con un sarvisi public Sivular

e tutt chi povar cuntaden tarmar,

alvaras al capell, slungar la men

e lò a dmandarag se col vachi e al fen

iran in ordan o s’ivan fica zò

cl’olm in campagn cl’iva cmandà lò.

E dop aver magna più d’un mez pui

lassand a so muiar tutt i arsui,

a pensa pina, nud, la faccia infiada,

als fava mnar ad lung a na carada

su la so mula e insima al so baross

guardand al vidi, al furminton e i foss

farmandas a tur sù un persag bon

o un bel pir szal cascà in dal caradon.

Turna a la cort, agh’ira un sarvitor

che ag lavava enc i pia moi ’d sudor,

alg sugava la schina e ag fava vent

e lò al bviva a rotta ad coll intent

una butiglia trata su dal poss

in n’atim sensa gnenc lasargn un goss.

Al dé ad ferragost l’ira costrett

a pugiar prest al gambi szò dal lett

parchè a gniva n’entar gren sgnuron

e in lè cal dè i magnavan cme i leon,

un vdel intiar con un bon parsutt

ma i cuntaden i armagnivan sutt

avend se e no na tegia ad sigulott

(almeno, acsé i durmivan ben ad nott!).

Passa cal dè, als dava par dasprà

al mé avocatt, magnand in mez al prà

una scudella pina ad bon fasua,

andand a vedar cume l’ira l’ua,

faghend drisar infin i ciold rusnent

e sgirandland cme un pover mendichent

con tut cla carna fiapa intorn ai brass

e con la canotiera povr umass!

Puvrett parchè al duviva già turnar

a Modna, in cal casen, a lavurar

sintir tent ciacri e andar a un quale process

lò c’ag piasiva tent vivar là in mez.

Imer (Mauro) Tinti

Tratto da: Turnand a San Szvan – Poesie dialettali – Dialetto di Disvetro di Cavezzo

Anno 1986