A m’ son sbaglia

’Na sirra ò vist

’na brutta faccia

a la stassiòn d’Bulogna.

I cavì long

’na barba da bandì

e ’n’aria ch’an tal dig.

Al spettava davsin al sottpassàgg.

”Adess a succèd quel”

a i’ò pinsà, e a vdiva

coi occ dla fantasia

’na rapina o forse ’na vendetta.

E sa’t cus’è success?

È rivà ’na ragàssa

da l’aria un po’ smarìda

con ’na puttinna

ch’la parìva un zugattlèn.

Lu l’à basà la zovna,

l’à ciappà in brazz

la bagaiétta e po’…

ò vist ’na làgarma

bagnar i péi d’cla barba.

Chi sa parchè al pianziva?

Cum’as fa prest

a dar una patenta.

Tratto da : Della vecchia Mirandola e di poche altre cose

Autore: Libero Gavioli

Anno 1989