La Fava

Na volta, Gesù, nostar Sgnòr, e S. Paul i gnivan a la Mirandula da S. Antònni d’ Camurana, tutt du vastii cum’è i fra d’l’Uspidal; intant ch’i andavan par la so strada i vedan un in mezz a campagna ch’al samnava d’la fava: al turava un bus par terra con un cavicc’, al gh mittiva dentar du o trì gran d’ fava e pò al gh tirava in zima d’la terra con un pé. I s’ferman a guardar e dop un poch, al Sgnòr al gh’ a dmanda: “Cardivv d’ faran dimondi?”. E cl’atar: “A dipend; se la terra l’am iùta”.

Al Sgnòr al tira dritt par la sò strada. Dop un poch al passa davanti a n’ atar che anca lù al mittiva d’la fava. Anch’a lù al Sgnòr al gh’ a dmanda:”Cardiiv d’ faran dimondi?”. E cl’atar: “A sper; se Idio l’am iùta”.

A la fin, quand a gnì al temp dal raccolt, la fava dal prim la gh’iva il piantini élti na pèrdga, dritti ed ardidi ch’i favan milla vòii ma senza scurnecci; la fava dal second l’era piccula e con poca sgarbazza ma la gh’iva dil scurnecci grassi e pini che da allora, da nu atar, a s’n’é ancora da vedar d’ cumpagni.

Tratto da “Quand al Sgnòr al girava pr’il stradi” di Vilmo Cappi

Letto da Flavio Rebecchi