In farmacia

Me marì al fa un master cl’è un gran gudióol, anch se al soppia pinsand a la pensioon:

aghn ‘è sempr’una cla veen propria a fasóol e tutt i dì agh’è dl’animasioon.

L’è propria un gran bel post la farmacia, tanta gent la s’agh ferma a far ruglett mitend in piàsa ognuun ‘na malatia, ch ‘as ghaa al muroidi o as corr al gabinett.

A far al farmacista as rid daboon!Anca ierdlà a ven dentar un daspraa ch’al vool spiegaar na bruta situasioon tgnend na man su la pansa, tutta rblaa:

– Che lù al ma scolta un pooc, ch’al ma corèsa, anch se i dutoor i’m dà dla sudisioon:

lù ca ‘al gh’ha al camice col taiascurèsa al pool propria capiir la situasioon!

Tutt’al siri, dòpp al telegiomaal,

in mez ai detersiv e al Formitrol,

i fan vedrun rimèdi cl’è speciaal

e a me am par che al so nom al sia Gardol.

Al servirevv pr’al cèso, par andaar:

a son tutt ingerii fin quasi al col!

Nisuun ancora am l’ha savuu cataar, ma a so ch’i disan: “Cagate con Gardol ” –

In farmacia as g’ha un cunsilii boon e as pool cataar di quei un poc speciai.

Mè marì al mostra ‘na predilesioon par cunsiliar i quéi più naturaii.

E acsì al diis che la toss la va tusuda, e con dla fam as cura i padidóor, e l’è risolutiva ‘na spremuda con dati pridùss par cura dal fardoor.

In farmacia a gh ‘è sempar muiment:

agh va anca quei ch’i ghan brenda la ciossa

o is fan faar pilunseen e liniment

s’igh’ha ì cuneen ch ‘i fan tutt la carossa.

Po ‘ a gh’ è chi a cómpra al polvrì pr’al pandoor, o un qualch unguent pràl grósti ac ghaa la ròia, e dalvolti a ven dentr’anch un quach sgnoor ch’a paar ch’a n’as capìsa cus’als vòia..

Al gira in larag, stricand un poc i dent: pian pian als porta ad banda dal bancoon a al fa pasaar, spetand, tuta la gent cum ‘un detectiv dla televisioon.

“Cal ma scusa, dutor, ma a ghoo un brufell gnuu su propria in una bruta pusisionn: al m’ha da visitaar par darum quel, ma bisogna ch’am méta in cul busoon!”.

Dit e fatt, in dal retro all’s fa guardaar, e gnanc i mudandoon ien bei schilent: “Dutor, cal digha cusa a ghoo da daar par la visita e pr’al medicament!!”.

Un giorn’in farmacia a ghè andaa ‘na vcina e la dmanda un gumeen dadree al bancoon: in un second la spuda in ‘na cartina la dintera, pr’averla da campioon.

In bela mostra, spudaciada e rosa, sott al nas la la mett ad me marì, ch’agh ven subitt ‘na bava vumitósa ad quél ch’al gh’iva in panza dal mezdì!

Po’,prilaa in là, un campion d’ogni misura al gha slonga, e par farla staar tacada dla cola garavèla con premura algh sonta, che la sia ben cementada.

Che gran via-vai ca gh’è in ‘na farmacia, e a s’agh good sol restand un po’ a scultaar. Tra doo paroli e ‘na qualch malatia a ven sìra in un lamp sensa pìnsaar!

Cagarott, pisarólì, nàti e dent: e lù al brungugna a al pensa a la pensioon! Me a digh che un acsì bel divertiment al n’as gha gnanc con la television!

Brunetta Panzani