DOP CL’HAA AVU 6 MUROS E PO L’E’ ARMASA SENSA SPOS?

Sinti un fat curios,

che da par tut a s’in descor,

na sgnurina che l’haa avuu 6 muros

e po l’è armasa sensa spos.

Al prim l’era un cuntadin,

tutt il volt che at la catava

sempar al la ciamava.

Na sira sota al purton

al g’hea fat la so dichiarazion

e po par du mes al gh’è andaa,

dop na discussion al s’è stufaa.

Al second l’era un specialista

che al feva tut a prima vista,

specialment par far di cont

in du minut l’è bel e pront

e par tgniragh l’allegria

al gh’insgnava la geometria

e al gh’feva vedar la misura

par truvar la quadratura.

Questa l’è la lunghezza

la s’multiplica par la larghezza,

as trova al risultat

e al cont l’è bele fatt.

Se a gh’era sbagliaa un’operazion

giustavan al cont sota al purton.

Dop du mes al se stufaa

e po’ al na ghè più andaa.

Al terz l’era un casar che al latt

la gh’andea a purtar,

tutt il siri che la gh’andava

lu sempar al la scherzava.

Na  sira par far più bell

i en andaa dadre dal casel

e là all’aria fresca

l’è suces al bel dla festa,

dop i s’en da apuntament

in un post più convenient.

E’ pasaa un mes e più

e po’ al casar an s’è vist più.

Al quart l’era un tadesch

par via ad ciapar al fresch,

e quant al gh’era da galon

da la gioia agh gniva i lagarmon.

Trinchen ein glas wein, lagh vliva dir,

par faragh vedar che la s’feva capir.

Ja, grussen alle susamen, a la salut,

e un pilon ad vin i al bvivan tutt.

Dop un mes post i g’ha cambiaa

e po’ al ghè più andaa.

Al quint l’era un murador

che al g’hiva da far un lavor,

na tramesa in dla stala

par dividar la cavala.

Le la truvava la cumbinazion

e lagh feva da garzon

e po al deva la bona sira e la bona not

in sinch minut in dal stanzot.

Dop vint dì al s’è stufaa

e gnanca lu an ghè più andaa.

L’ultim l’era un american

che al saviva anch l’italian,

a la sira al gniva lì par lì

do you love me young ladi?

Le rispundiva all’american

Yes, at voi ben in co e anch a dman

e se mai ti t’ha da esitar

t’vadrà in seguit cusa son bon ad far.

Dop un mes l’è anda via

e lee l’ha pers la cumpagnia.

Sperem che al setim al sia un sucon

e che al diga ad spusarla dabon

e acsì as ripararà

quel ch’è staa in società.

Al me doni andaa pianin,

a metruv con quei davsin,

lasaa andar i specialista

che i fan tutt a prima vista,

a n’andar al casel

che av pol capitar quel,

an sarcar brisa i tedesch

che an ac’sia da star fresch

an tor a man i murador

che in ingrosan al lavor,

e rispetaa i american

che i pol gnir bon in co e dman.

Sirudella del cantastorie Bruno Vecchi letta da Tancredi Veronesi