Caal butghini

V’arcurdaa cal butghini da na volta chi savivan da sira e naftalina, da petrólii o da carta zala onta, da sùcar ad lucrèsia o da mintina?

Agh n’era una, sóta da cà mia,

quand a s’era putina, ch’im mandavaan:

là dentar l’era tuta ‘na magia,

con i àsi ad legn che sóta i pè i ciucàvan.

E cal butghini cume la Pustina

in du agh ‘catavaan mila e più ciapeen,

cart ‘asorbente, bigli e scolorina,

ed al letri ad Nadaal coi brilanteen?

Scarsa la luus, e scatuli un poc frusti in cal butghini, ognuna col so’ udór; bancoon negar, vadrini brisa lustri, bisachi voodi, e insunii dentr’al coor.

In cal vadrini, pini un poc da tutt, ac’catavan, putèn, quel ch’as piasiva: tutt i dì, con al temp sia bel che brutt, col nas atac ai vedar lì as luschiva.

E anch se alóra angh ‘era al vetrinista ad aiutaar la nostra fantasia, quél ch’as cumprava l’era ‘na conquista, e far ‘na spesa l’era poesia.

In cai butghini as bativa al coor:

da la bisaca a gniva, un poc sblisgheent,

un scuud o, vultaa su con tant’amoor,

sent franc ad carta, e a s’eran ben cunteent!!!

Par Nadaal al ghirlandi dal lusini,

qualcuna ismórsa par economia,

e stéli d’oor insima al copertini,

e i timbreen, e in dal coór tanta alegria.

E al bòci ad védar insìma ai albareen, e cal zugatul cl’era già in dla testa, fra candlini un po’ smorti e i’angiuleen …e cumpraar l’era sempar ‘na gran festa!!!

L’era ‘na festa, e a gh’era libertaa ad far d’insunii, e tutt l’era più bel, con chi pacteen ad paan e povertà,d’incoo,ch’a fem la spesa col carel.

Brunetta Panzani