Al luminarii ad Nadaal 

Là pr’al Festi, girand dlonga a la strada, fand du pass col Nadaal dentr’in dal coor, as resta, s’a guardem, l’inghirlandada con al lusini ad mila e più culoor.

Tutt a brila, par far maravigliaar, e agh manca sol la roda e i baracoon, ma a sarvirew anch metar’s a pinsaar cus’as pool far par gnir un poc più boon!

A basta sol un quel in dua tacaar, e al lusini i s’invlupan dapartutt: a na piopa, a na stròpa cl’è da sgaar, a na tirela, a n’arbur bell o brutt.

E acsì sui pèen, con gran coreografia, as vedd stéli, Befani e di fiuroon; dal righi rósi e zali par magia is cor’n adree a la longa sui balcoon.

Là in d’angul a fa mostra un albareen cal par un sproc e al val na patarlenga; insima al cà a lusìs anch ‘i cameen e, sl’an stà atenti, fin la cagna renga.

As pool ciamar di impresi par muntaar tuta sta luminaria e stal bucini: più che far dal gran been e risparmiaar, as fa la gara a chi a gha più lusini.

Ligaa cum ‘un salam, un pal dla luus al brila tutt, e al par un quél dla NASA; anch ‘i gatt i sta a l’ai in dal far i fuus, perchè chi in gir sta moda a paar cla piasa.

Dal mezi tombi dentr’in di giardeen i ghaa al lus culuradi a intermitensa:. a paar ch ‘agh sia la fera dal Brueen e da sta quel an’s pòsa più far sensa!

Ho vist na cà cla paar cla sia disgnada: celesti al luus chi segnan i cantoon, ogni porta e ogni fnestra incurnisada, con al bòci arlechino sui vultoon.

La lusis tùta, ad banda da la cà, fin la cucia dal caan, con ii oss e i zoog, e la bestia, cuarìda un poc più in là, l’è brenda, con al col un pisafoog.

E tutt i quéi i’en ben iluminaa, ch ‘as veda puur la forma e l’abondansa, perchè Gesù Bambeen apena naa als fàga impinir been l’occ e la pansa.

In mez a la fumana, al giass e al moi, e fand a gara a chi a ni spend da più, tutt l’è staainghirlandaa, infin i sói, e as rend unoor al bon Bambeen Gesù.

Brunetta Panzani