Un dì ch’an gh’era minga guerri in cors (gnint dati parchè al legendi in gh’han minga temp) l’imperator romano Costanzo, ch’l’era adree a giraras i dì gros, al pinsè ad dar na gran festa ch’la durò par tutt al dì. La sira tutt a séna, na séna in pee parchè a gh’era dimondi invidaa e pochi scranni. A ch’la séna a partecipava anc Manfredo, n’om bellissim ch’al dasgniva da na famia nobile dimondi davsina a la cort dl’imperator. Intant ch’l’era adre a spilucar in dal piatt al fa un pass indre e al ciapa contra al brass ad na ragasola e al gh’fa cascar al piatt par tera. Als gira par admandarag umilment scusa e incrosa i occ dla pulzella. Oh, maravia: l’era la più bela ragasola ch’lis mai vist in vita sua. Ed anca le l’armas culpida da lù, tant che al gomat agh fè mal tuta nott.

Cupido l’iva cintraa al bersai n’atra volta, ma boia d’un mond ladar le l’era Euride, la fiola preferida dl’imperator, (l’unica).

Quand Costanzo al ven a saver al quel al s’ncasa ad brutt e al taca a sigaar: an darò mai al consens al matrimoni.

Manfredo ed Euride alora ad nascost i van infin a Las Vegas e i sa sposan l’istess.

Ad turnar a Costantinopoli però an s’in dascor minga acsè i van in Italia e i tacan un gir fasend tapa prima a Napoli e po’a Ravenna, ma dop un po’ ad temp ariva la notisia che l’imperator al vol gnir in Italia e propria da cal bandi.

Alora a ripart al gir e i ariva a Bulogna.  I vresan andar dai partigian in muntagna, ma la salida ad San Luca la risulta trop dura acsè i devian vers al vali dal mudnes, che l’è in dla bas,a an ghè minga salidi e as fa meno fadiga.

Dat n’uciada d’intoran, e vist che i cuntaden ch’a gh’era ieran bona zent e operos e che al post l’abundava ad latt, carna e ad tutt quel che i psiva aver bisogn, i decidan ad farmaras lè. S

icome fidaras l’è ben, ma an fidaras minga l’è mei, in rivelan minga la so vera identità e i drovan di nickname fasull.

Pasa al temp e i tacan a faras amig i vilan che in cambi dal gioie che Euride la s’era purtada adre igh vendan dal terri e Manfredo av costruiss insima na casetta col focolare.

Sintendas al sicur i du spos is dà a la lettura dla Bibbia tutt al siri davanti al caminett finchè Euride la s’ingrassa, ma ad brutt. Dop na dieta durada nov mes la ritrova la linea e is catan con tri baghet in na volta sola, san e fort e i ciaman Pio, Pico e Papazono, ma sol quand i sa sluntana, quand iè davsen igh disan tu, tu e tu.

Intant con i raport ad bon vicinato is fa sempar più benvolere dai cuntaden d’intoran e i dventan famos e onoraa e tgnù in gran cont.

In dal fratemp, l’imperator as distraiva con dal gueri a destra e a sinistra, parchè lù l’era un moderaa, e al s’era mis in testa ad conquistar la zitta d’Aquilegia. Mo al ghiva d’aver n’esercit cal valiva poc parchè, dop averla circundada e misa sot asedio, dop soquant mes la resistiva incora. Stuff d’aspetar Costanzo, par i amigh “show”, al spedì di banditor in dla basa mudnesa par catar su di rinfors.

Manfredo, che oltre che bellissim l’era anc furbissim, al ciapa l’ucasion al vol e al fa su un picul esercit ai so cmand cal mett subit a disposion dl’imperator e al partiss par Aquilegia. Sensa star l’è a perdar tant temp al và subit all’atac e in du dè al conquista, tutt da par lù, la zittà.

L’imperator, che quand Manfredo al s’era presentà an l’iva minga gnusù, al và so ad testa da la cuntintessa all’a ciama a la so presensa e all’a quacia d’unor, agh dà un trenta e lode e all’a fa Cavaliere militare——— tò mo-

Manfredo l’imprufita dal mument e a ga svela la so identità e agh conta tuta la storia. L’imperator tutt comoss dal peripezii, chisà cus al ghiva dat d’intendar cal furbon, al la perdona par averag purtaa via la fiola prediletta, l’unica, e in più agh regala tutt al terri che Manfredo l’è bon ad circundar in na giurnada a cavall. Cum a savemm tutt, Manfredo l’è furbissim e cambiand al cavall quand l’è stuff con un fresc al circonda tanta tera che al’imperator a ga scapa ditt: ma cum a son sta caion———-
A stal punt a ghè l’incontar tra l’imperator e la fiola Euride e quand agh conta dal parto triplo, a chi temp l’era ben dificil ch’andass tutt ben in un cas dal genar, Costanzo l’armagn talment culpii che gridand al miracul al dis: d’ora in avanti t’at ciamarà Miranda.

Turnaa a cà Manfredo as fa su al manghi e al taca a costruir di castei, par sé e i fioi e al più bel al san ten lù.

Naturalment alla ciama Mirandola.

Va mo là.

Vanni Chierici