La me Mirandla l’è bela par tent motiv:

i so viaii ad la circonvalasion, enca se a sarev mei aver ancora la mura…..

al liston enca se a sarev mei aver ancora la fortesa col pont c’as leva

al so castell  che dopa al restauro l’ira turnaa apresabil, adesa dopa al teremot, sperem….

la piasa dal castell, enca se a sarev mei aver ancora al turion, quel saltaa in aria con un fulmin mudnes

al Teatar Nov, che is l’invidia in dimondi, parchè l’è na picula Scala, dimondi più bel che al Storchi

l’edicola ad banda al Teatar Nov, enca se a sarev mei aver ancora la torr con l’arloi

la so stasion ad Sivdal, che in fond l’è sol a quatar km dal centar; più in là an sa psiva minga farla…

al cureri dal trasport public vers  Modna  enca se l’ira dimondi mei al trenin ca gh’ivan fin al 1964

i so divertiment , cinema e sali da ball, quend i gh’ira…..

i supermarcaa, che sa gh’in fuss enc meno a prev vivar mei al centar

l’ingres principal da porta Mantova col Kebab e al marsumari intoran, forse l’ira mei quend a gh’ira Ghifa…

l’invension dal sampon, enca se i mudnes is l’à ciavaa e i l’à ciàmaa sampon ad Modna

al so fabrichi dal Biomedical invintadi dal dutor Vrunes, a Modna però, i vedan sol al piastreli e al maii

esar  la capitale mondiale dal biomedicale, enca se a Modna i s’è sol impinii la boca e al bisachi con sta parola chè

i prim quatar pien dal so usdal…. aspetand  chiatar trii, che i’à purtaa a Modna  insem al dunasion dal dutor Vrunes

la so mèsa tangenziale che i la duviva far in dal ’90 ma i’à druvaa i sold a Modna e sol col teremot is l’à fata

i so colegament stradai con Modna, enca se a sarev mei drisar na qual curva e far na qualc tangenziale su la SS12

l’A22 che la duviva pasarag a tes e inveci da Modna i’inteligenton, i’à decis ad deviarla dadlà da Carp

al so Marcaa dal Bestii, che is l’à purtaa a Modna parchè dopa averas rubaa l’A22; ormai l’ira taiaa fora da la viabilità….

al mito ad la Cispadana, enca se a sarev mei an n’aver più al mito e aver la superstrada

al so scoli, che i tiran tent ragas dal bàsi tutt intoran, mudnesa, mantvena, fraresa, rovigota

al Tecnopolo sul biomedical, che s’an fus minga staa pr’al teremot, la Provincia l’al vliva far a Spilambert…

la so pianura immensa, però se un qualc bosc al fus armas, al na guastarev minga

esar la part più a Nord ad la Provincia ad Modna, enca se a sarev  mei esar armas un Ducato dastacaa…

I so partigien che enca sensa la protesion ad la muntagna i’à lutaa e datt la vita par la nostra libertà

la popolasion tuta d’un pess, ca mantegn fermi al so ideii, enca se forse un cambiament in stentatri ann….

la so gent che l’è acsè laboriosa e bona, che la provincia la trata infèn da caiona…..

al tenti  asociasion ad volontariat, che i vegnan sfrutadi da Modna par daras sempar meno, tent i ranàr is sa rangiar….

la so scola ad musica, c’ la fa paura in tutt i concors musicaii internasionaii

la forsa ad la so gent, che dop al teremot l’ha reagii come sa fus gnent

al so beli barchesi sensa vachi rifati dop al teremot; queli col vachi sperem…..

al so Cesi ancora semidistrutti, ma importent l’ira sistemar al Dom ad Carp;  sperem  cla cambia…..

la so fumena d’avtunn, bela fisa c’as taia col curtel, enca se l’è mei quend a gh’è al sol

la creasion ad l’AIMAG, enca se adesa l’è finida in men a Carp, che par giustar i so cont al n’à vinduu un pcòn a HERA

i so patrioti risorgimentai, specialment quei c’à sparaa al Duca ad Modna;  che pcaa ch’iava sbaglia la mira……

al so Memoria Festival,  in quel ad la filosofia in s’à minga ciamaa; i s’è dasmingaa ad Giuanen cal filosuf mirandules!

Mirandula 11/06/18

Ubaldo Chiarotti