Al gall e la volp

A gh’era na volta in un pulàr un bell galett, con na cresta rossa cum’é na pupla e na còa culurada ch’la simbrava quella dal capell di bersaglièr, ch’l’andava matt par bcàr l’ùa sott’il tirelli; al saltava contra i grapp in pingulon, quèi ch’al gh rivava, e al zarniva i gran più madur e più gròs, ch’al s’ gudiva. Na matìna, pr’al fresch, intant ch’al tindiva a la sò impresa senza badar a atar, a passa la volp, che senza diragh né ciào né miào, l’agh salta adoss, l’al ciappa in bocca e l’as mett a scappar. Figurat té cum’é armas al galett! Par furtuna che in campagna a gh’era di cuntaden ch’i lavuravan, i sentan al galett a zigàr, i vedan la volp con al galett in bocca e i taccan a corrgh’ adre par mezz i traverso e la volp, via, da tramezz i spagnar; sempar con al sò galett in bocca. Al galett, ch’l’era piuttost dascòmad, più la volp la s’a sluntanava, più al s’ la vdiva brutta. Ma intant in d’ la sò testa al li pinsava tutti par vedar d’salvar il penni; a la fin, parendagh, forse, ch’l’a fuss la manèra bona, al gh diis a la volp, ch’l’a curriva: “Mò digh a là lor ch’i tàsan e ch’i tendan a zappar, ch’l’é na faccenda la nostra ch’in gh’ entran”. A la volp, ch’i gh’eran adree da tutt i cò, al gh parì un ragiunament ben fatt; l’as farmò, l’avrì la bocca par dir acsé e al galett al gh vulò via.. .acsé da spinta che da i pra d’ S. Marten andù i eran al vulò in zima a la punta d’la cros dal campanil dal Dòm, ch’l’é suttila cum’é un stecch; e da allora al n’ha più vlù gnir zò ed anzi da la paura d’ cascar al stà acsì ferum che mè dil volti, quand a pass da d’lé e a guard in sù, a zugarevv ch’l’. é d’ latta.

Tratto da “Quand al Sgnòr al girava pr’il stradi” di Vilmo Cappi

Letto da Flavio Rebecchi